Dar yaelea

Wasamaria wakimsaidia mwathirika wa mafuriko baada ya kumuokoa akiwa amejishikilia kwenye mti ili asizame kwenye maji ya Mto Msimbazi kutokana na mvua kubwa zinazoendelea kunyesha jijini Dar es Salaam. 

 Waokoaji wakiwaokoa watoto waliokuwa wamezingirwa na maji majumbani mwao eneo la Kigogo Mbuyuni, jana, kufuatia Mafuriko ya Mvua zinazoendelea kunyesha jijini Dar es Salaam.

Ruhuza adai Tendwa amekurupuka

SAKATA la kuvuliwa uanachama kwa mbunge wa Kigoma Kusini, David Kafulila limezidi kuibua mjadala baada ya Katibu Mkuu wa NCCR-Mageuzi Samuel Ruhuza kumjibu Msajili wa Vyama vya Siasa, John Tendwa kwa kusema anatoa kauli za kukurupuka.

Kwa upande wake, Kafulila amesisitiza kuwa yeye bado ni mbunge, licha ya chama chake kutangaza kumvua uanachama, mwishoni mwa wiki iliyopita na kwamba anakamilisha taratibu za kwenda jimboni kwake kwa ajili ya ziara ya kikazi.Kauli hizo ni mwendelezo wa mjadala kuhusu hatma ya mbunge huyo, baada ya chama chake cha NCCR - Mageuzi, kumvua uanachama hatua ambayo kikatiba, ikiachwa kama ilivyo inamfanya apoteze ubunge.

"Ninachoweza kusema ni kwamba watu wajue, mimi bado ni mbunge wa Kigoma Kusini na mwishoni mwa wiki hii, naenda huko kwa ziara ya kikazi," alisema Kafulila jana alipokuwa akizungumza na gazeti hili.
 
Kafulila alisema licha ya uamuzi wa Halmashauri Kuu (NEC) ya NCCR-Mageuzi kumfukuza uanachama, kuna michakato mingi inayoendelea ndani ya chama hicho kuhusu suala hilo.

"Nisingependa kueleza ni michakato gani, lakini ieleweke tu kwamba utekelezaji wa hatua ya kunifukuza ni mchakato usioweza kunifanya nikome sasa kuwatumikia wananchi wake," alisema.

Aliendelea, “bado naendelea na kazi kama Mbunge wa Kigoma Kusini, naomba wananchi watambue hilo.”

Ruhuza amjibu Tendwa
Hata hivyo, Ruhuza akizungumzia ushauri wa Msajili wa Vyama vya Siasa Nchini kutaka suluhu ya jambo hilo, alisema "Tendwa, ni mtu wa kupenda kukurupuka katika kauli zake."

“Kwanza, siamini iwapo haya maneno yametoka kwenye mdomo wa Tendwa, ila kama ni  kweli inatoka mdomoni mwake, basi yeye amekurupuka na mtu anayependa kutoa matamko sawa na mtu aliyetoka usingizini,” alisema Ruhuza.

Alisema ikiwa Tendwa anadai kwamba ofisi yake haikupata mwaliko wa kuhudhuria kikao cha kumng’oa Kafulila, wakati akielewa kilichofanya hivyo ni kikao cha NEC ya chama ambacho yeye, (Tendwa) siyo mjumbe basi matamshi yake yana kasoro.

“Anazungumza kuhusu wajumbe batili, yeye amewajuaje na amewaona wapi? Orodha ya wajumbe wa NEC ipo ofisini kwake, anaelewa kabisa idadi yao na kila kitu, sasa sijui haya maneno anayapata wapi?,” alihoji  Ruhuza.

Ruhuza alienda mbali zaidi na kumuita Tendwa kuwa ni mchochezi wa migogoro ndani ya vyama vya siasa akidai kuwa, licha ya kusikia viongozi wa chama hicho wakitukanwa kwa muda mrefu, hakuwahi kuchukua hatua yoyote.

“Halafu leo anasema tutumie busara, kuna wakati alisema tulipata usajili bila kukaguliwa ikabidi tumpeleke mahakamani, akatuomba msamaha. Huyu anakurupuka usingizini anatoa matamko,” alisema Ruhuza.

Ruhuza alimshauri Tendwa kabla ya kuzungumzia suala hilo, asome  Katiba ya NCCR – Mageuzi ili kubaini  hatua zinazopaswa kuchukuliwa dhidi ya makosa yaliyofanywa na Kafulila.

Mbunge CCM
Mbunge wa Viti Maalum CCM, Sara Msafiri, alisema suala la Kafulila linapaswa kupewa uzito na si kwa mtizamo wa kisiasa pekee.“Utaratibu wa watu 30 kutofautiana na wananchi wa jimbo zima siyo jambo la kufurahia, hili jambo linahitaji busara zaidi,” alisema Msafiri.

Msafiri alisema kitendo cha NCCR-Mageuzi kumteua Hashim Rungwe agombee urais halafu baada ya muda mfupi kumwona hafai hata kuwa mwanachama, kinaonyesha udhaifu mkubwa kwa chama hicho.

“Mtu mliyemsimamisha kugombea urais hata mwaka haujaisha, mnamwona hafai tena hata kuwa mwanachama. Hii ni aibu na wananchi wanatakiwa kuwa macho na vyama kama hivi,” alisema Msafiri.

Hata hivyo, Ruhuza alijibu hoja hiyo akisema, “Leo unaweza kuwa na mtoto mzuri sana ,lakini kesho akawa mbaya mno. Kwa hiyo hata sisi mtu akibadilika kinachotakiwa ni kumchukulia hatua.”

Mwishoni mwa wiki iliyopita, wajumbe 38 wa NEC ya NCCR-Mageuzi waliamua kumvua uanachama Kafulila kwa tuhuma za kuongea mambo ya chama nje ya utaratibu wa vikao vya chama.Kafulila mbali ya tuhuma hizo pia  alituhumiwa kutaka kufanya mapinduzi ya kumg’oa madarakani mwenyekiti wa chama hicho, James Mbatia.

Hata hivyo, uamuzi huo wa kumvua uanachama umepata upinzani mkali kutoka kwa wasomi na wanasiasa mbalimbali ambao wamenukuliwa wakisema kuwa NCCR- Mageuzi walikurupuka na inafifisha demokrasia ndani ya chama.

Mvua ya radi yaua watano Dar es Salaam

Msamaria akimvusha kikongwe mkazi wa Jangwani baada ya makazi yake kuharibiwa na mafuriko yaliyosababishwa na mvua kubwa zilizonyesha jijini Dar es Salaam usiku wa kuamkia Desemba 20.

Wakazi wa Dar es Salaam wakishuhudia kazi ya uokoaji wa watu waliokwama kwenye maji ya Mto Msimbazi eneo la Kigogo Darajani. Shughuli hiyo ilikuwa ikifanywa na Kikosi cha Uokoaji cha Halmashauri ya Jiji jana.

Uamuzi wa kumukomoa David Kafulila NCCR Mageuzi ni ufisadi - Tendwa

MSAJILI wa Vyama vya Siasa nchini, John Tendwa amevitupia lawama vyama vya siasa kwa kufanya uamuzi wa kukomoana na kusababisha gharama zisizo za lazima kwa taifa na kutolea mfano gharama za Uchaguzi Mdogo ambazo zinasababishwa na kuvuana uanachama,
akizifananisha na ufisadi.

Kauli yake imetokana na hatua ya mwishoni mwa wiki ya chama cha NCCR-Mageuzi kumvua uanachama mbunge wake wa Kigoma Kusini, David Kafulila, hatua ambayo ina maana amepoteza kiti hicho cha ubunge na sasa taratibu za Uchaguzi Mdogo zitafuatwa kwa mujibu wa Katiba.

Tendwa amesema ingawa yeye siyo mhusika wa gharama za uchaguzi, lakini Uchaguzi Mdogo
una gharama kubwa ambazo alisema si chini ya Sh bilioni 19 na uchaguzi kama huo unakuwa ni gharama kwa kuwa haukupangwa kufanyika.

Msajili huyo aliyasema hayo wakati akizungumza na waandishi wa habari Dar es Salaam jana baada ya kutoa mada ya uongozi kwenye mafunzo ya viongozi wa Baraza la Vyama vya Siasa kuhusu uongozi, uwajibikaji na utawala bora.

Alipotakiwa kutoa maoni yake kuhusu kuvuliwa uanachama kwa Kafulila, Tendwa alisema Katiba ya sasa hairuhusu mtu anapovuliwa uanachama kujiunga na chama kingine kuendelea na ubunge wake, hivyo ni lazima ufanyike Uchaguzi Mdogo kujaza nafasi hiyo.

“Sasa hizi bilioni 19 nani atakuwa amesababisha? Maana nyie ni mahodari wa kuandika
mafisadi na hili je ni ufisadi au ni nini?

Maana tusiwe mahodari wa kuisema Serikali, bali pia vyama vya siasa vinapaswa kuisaidia Serikali badala ya kuisababishia hasara,” alisema Tendwa na kuongeza:“Chama kufanya hivyo ni kupoteza sifa, nafikiri kuna adhabu nyingi ambazo zingeweza kutumika tofauti na kumfukuza
uanachama, maana hii ni hasara.

Sisi hatuingilii uamuzi wa chama, ila huo ni ushauri maana hata walichokuwa wakijadili kwenye vikao hatukijui.”

Tendwa alivitaka vyama vya siasa kutumia busara katika kufanya uamuzi badala ya kufanya
uamuzi wa kukomoana katika vikao vyao na hivyo kusababisha hasara kubwa kwa taifa ambazo si za lazima.

Msajili huyo alisema Kafulila anaweza kuomba rufaa ndani ya chama, lakini nje ya chama, pia
anao uhuru wa kwenda mahakamani na atakaposhinda kesi atakuwa mbunge wa wananchi wake.

Akizungumzia suala hilo, Katibu wa Halmashauri Kuu ya Taifa (NEC), Itikadi na Uenezi wa
Chama Cha Mapinduzi, Nape Nnauye alisema yeye si muumini wa kuwafukuza wanasiasa vijana kwenye vyama vya siasa, bali ni muumini wa kuvitumia vyama vya siasa kuwalea vijana.

“Sisi tunategemea vijana wanakosea ila tukijenga utamaduni wa kuwafukuza wanasiasa
vijana katika vyama vyetu nani atawalea na nani atawaelekeza vijana?

Mimi si muumini kabisa, mtu mzima utasema sasa huyu ameshindikana, lakini vijana hapana,”
alisema Nape na kuongeza: “Kijana akikosea leo afundishwe.

Sasa angalia suala la Kafulila, aliondoka Chadema na wakamuita sisimizi na majina mengine ya
ovyo, baadaye amekwenda NCCR nao wamemfukuza, sasa aende wapi?”

Mafunzo hayo ya siku mbili yanawashirikisha viongozi wa vyama mbalimbali vya siasa kwa
lengo la kuwaelekeza kuhusu mahusiano yao na wanachama, kuona ni jinsi gani vyama vinawajibika katika ulinzi na usalama wa taifa pamoja na kuangalia maadili ndani ya vyama vya siasa.

Kwa upande wake, Kafulila akizungumza na gazeti hili kwa simu jana, alisema hana tatizo na uamuzi uliotolewa na chama chake, bali anatulia.

Aidha, Kafulila amesema baada ya siku mbili kuanzia jana, ndipo atakapozungumzia kwa undani suala hilo kwa kuwa kwa sasa kuna taratibu zinazoendelea kufuatwa.

“Isingekuwa vizuri kuzungumza kwa sasa, najua wengi wangependa kunisikia zaidi,
lakini sisemi kwa leo (jana),” alisema Kafulila aliyevuliwa uanachama Jumamosi iliyopita na
Halmashauri Kuu.

Wanaume Kigoma wasindikiza wake zao kliniki

KUMEKUWA na ongezeko kubwa la wanaume wanaowasindikiza wenzao kuhudhuria kliniki ya baba, mama na mtoto katika Manispaa ya Kigoma Ujiji kwa kipindi cha mwaka mmoja uliopita.

Mwakilishi wa Taasisi ya Wanawake na Maendeleo (WAMA) Mkoa wa Kigoma, Leonida Leonald alisema hayo wakati wa kukabidhi vitendea kazi kwa timu ya waelimishaji na uhamasishaji afya ya msingi katika jamii ya Manispaa ya Kigoma Ujiji.

Akitoa takwimu kuhusu mafanikio hayo, Leonald alisema katika kipindi cha hadi kuishia Oktoba mwaka jana, ni wanaume 15 tu waliowasindikiza wenzao wao kliniki katika wanawake 120 waliohudhuria kliniki.

Alisema baada ya uelimishaji na uhamasishaji kufanyika, hali hiyo imeadilika na hadi kufikia Novemba mwaka huu, wanaume 91 waliwasindikiza wenzao kliniki ambapo wanawake 96 walihudhuria kliniki.

Mwakilishi huyo alisema mafanikio hayo yanatokana na timu hiyo ya uelimishaji na uhamasishaji afya ya msingi jamii inayofanywa chini ya usimamizi wa WAMA katika kata saba za Manispaa ya Kigoma Ujiji.

Kwa upande wake, Mwakilishi wa WAMA kutoka Makao Makuu, Gloria Minja alisema baiskeli 30, miavuli, makoti ya mvua na viatu vya mvua, vimekabidhiwa kwa watendaji wa timu hiyo.

Minja alisema vifaa hivyo vimetolewa kuwasaidia watendaji hao wanaofanya kazi kwa kujitolea kuifikia jamii wakati wote wa majira ya mwaka na kazi kubwa iliyowafanywa na watu hao, imesaidia katika mchakato wa kusaidia utekelezaji wa Malengo ya Maendeleo ya Milennia.

Akikabidhi vifaa hivyo, Mkuu wa Wilaya ya Kigoma, John Mongela alitoa mwito kwa wajumbe wa timu hiyo ya uelimishaji kutumia vitendea kazi hivyo kuhakikisha vinafanya kazi iliyokusudiwa na kuifikia jamii kwa urahisi.

Zitto- Mfumuko wa bei hatari kwa uchumi wa taifa

NAIBU Kiongozi wa Upinzani Bungeni, Kabwe Zitto amesema mfumuko wa bei nchini ni tishio na unahatarisha uchumi wa Taifa na hivyo kutoa mapendekezo manne ili kuuhami uchumi na kupunguza upandaji wa kasi wa gharama za maisha.

Zitto, ambaye pia ni Waziri Kivuli wa Fedha, aliyasema hayo katika taarifa yake aliyoitoa kwa vyombo vya habari jana na kueleza kuwa mkakati mahususi unatakiwa ili kubadili hali hiyo.

Miongoni mwa mapendekezo aliyoyatoa ni kutaka kuongeza uzalishaji wa chakula kwa kuweka mbinu za kukuza uchumi wa vijijini ikiwa kama njia mojawapo endelevu ya kupunguza mfumuko wa bei nchini.

“Serikali sasa iache maneno matupu kuhusu sekta ya uchumi vijijini kwa kuelekeza nguvu nyingi huko, bali iruhusu na ivutie kwa kasi na kutoa vivutio kwa wazalishaji binafsi wa Sukari na mpunga katika mabonde makubwa,” alisema mbunge huyo wa Kigoma Kaskazini (Chadema).

Pia alitaka Waziri wa Kilimo, Chakula na Ushirika na maofisa wake watoke ofisini na kuhimiza uzalishaji mashambani, fedha zielekezwe kujenga miundombinu ya barabara vijijini.

Aidha, Zitto amependekeza Serikali kununua chakula cha kutosha hasa mchele na sukari kutoka nje na kukisambaza kwenye soko ili kupunguza upungufu wa bidhaa katika masoko.

Pendekezo lake jingine ni kujengwa kwa kiwanda cha kutengeneza gesi ya matumizi nyumbani kwa haraka ili kupunguza bei ya gesi, kuepuka kuagiza gesi kutoka nje na hivyo kuokoa fedha za kigeni na kutengeneza ajira.

“Kupanda kwa bei ya gesi asilia kunatokana na kwamba Tanzania inaagiza gesi hii yote kutoka nje ilhali malighafi ya kutengeneza gesi ipo hapa, Shirika la Maendeleo ya Petroli nchini liingie ubia na kampuni binafsi ili kuwekeza katika kiwanda cha kuzalisha gesi hatimaye kushusha bei,” alisema Zitto.

Pendekezo lingine alilolitoa ni kutaka ushuru wote unaokusanywa kwenye mafuta ya taa upelekwe Wakala wa Nishati Vijijini (REA) ili kufidia kupanda kwa bei ya mafuta ya taa.

“Mfumuko wa bei katika bidhaa ya mafuta ya taa unatokana na uamuzi wa kuwianisha bei ya mafuta ya taa na dizeli ili kuondoa tatizo la uchakachuaji wa mafuta, tatizo limeondoka lakini wananchi wanaumia sana, uamuzi sahihi wa kisera ni kupanua huduma za umeme vijijini kwa kuipa fedha zinazotokana na ushuru wa mafuta ya taa Wakala wa Umeme Vijijini,” alieleza.

Alisema usambazaji wa umeme vijijini utaongeza shughuli za kiuchumi vijijini, kukuza uchumi wa vijijini, kuongeza mapato ya wananchi kwa kuongeza thamani za mazao yao na hivyo kupunguza athari za mfumuko wa bei.

Pia alitaka sera ya matumizi ya serikali iangaliwe upya kwa kupunguza kwa kiasi kikubwa matumizi yasiyo ya lazima, na kuelekeza fedha nyingi zaidi katika uwekezaji umma .

Alisema mfumuko wa bei unasukuma Watanzania wengi zaidi kwenye dimbwi la umasikini na pia unapunguza uwezo wa Serikali kutoa huduma za jamii kupitia bajeti na hata kutimiza mipango ya miradi ya maendeleo kama miundombinu ya barabara, umeme, bomba la gesi na madaraja.

Alisema mfumuko wa bei umezidi kuongezeka hali ambayo inaonesha kwamba Bajeti ya Serikali iliyopitishwa na Bunge, Juni, imepunguza uwezo wa kununua bidhaa na huduma kwa takribani asilimia sita.

“Hii ni sawa na shilingi bilioni 780 kuyeyuka katika Bajeti katika kipindi cha miezi minne tu ya utekelezaji wa wake, kutokana na kasi hii dhahiri kwamba, ifikapo mwisho wa mwaka wa Bajeti ya Serikali itakuwa imepoteza kwa kiasi kikubwa uwezo wa kununua bidhaa na huduma kwa zaidi ya robo ya bajeti yake,” alisema.

Alisema hali ni mbaya zaidi kwa wananchi kwani mfumuko wa bei za vyakula umekua kwa kasi kutoka asilimia 14.8 Julai hadi asilimia 24.7 Novemba, hivyo kumuumiza mwananchi ambaye kipato chake kipo pale pale.

Alisema kwa upande wa mfumuko wa bei wa mafuta ya taa na gesi asilia unapaa kwa kasi kama moto ambapo bei ya mafuta ya taa yamepanda kwa asilimia 71 kati ya Novemba 2010 na Novemba 2011, huku bei ya gesi asilia ikiwa imepanda kwa asilimia 35.

Alisema “tusipokuwa makini na kupata majibu sahihi ya tatizo la mfumuko wa bei za vyakula, wananchi wengi na hasa watoto watapata utapiamlo na Taifa kuingia gharama kubwa katika kuwapatia huduma ya afya”.

Alisema kuna hatari ya dhahiri kwamba ifikapo Januari mwakani, tutakuwa tumerejea mfumuko wa bei wa kiwango cha mwaka 1992 (asilimia 21.9) zisipochukukuliwa hatua za haraka na hata kuzidi mfumuko wa bei kiwango cha juu kabisa ambacho kilifikiwa mwaka 1994 (asilimia 33).

Kafulila akalia kuti kavu NCCR

Mbunge wa Jimbo la Kigoma Kusini (NCCR-Mageuzi),David Kafulila

MBUNGE wa Jimbo la Kigoma Kusini (NCCR-Mageuzi), David Kafulila, ambaye Desemba 8 mwaka huu alienguliwa katika nafasi ya ukatibu mwenezi, huenda akavuliwa uanachama.  Habari zilizolifikia gazeti hili jana zimeeleza kuwa mbali na kuvuliwa wadhifa huo, mbunge huyo, sasa anakabiliwa na hatua nyingine ngumu zaidi kisiasa, baada ya uongozi wa chama hicho kutaka kumvua uanachama.

Kwa mujibu wa habari hizo, hatua hiyo imepangwa kufikiwa Jumamasi hii, wakati Halmashauri Kuu ya chama hicho itakapoketi kwa dharura jijini Dar es Salaam kujadili mambo mbalimbali ikiwamo, suala la Kafulila.  Katibu mkuu wa NCCR Mageuzi Samwel Ruhuza alithibitisha jana maandalizi ya kikao hicho cha dharura lakini, akasema agenda zake hazijapangwa.

"Ni kweli Halmashauri kuu imeitishwa kwa dharura Jumamosi hii jijini Dar es Salaam na baadhi ya wajumbe wameanza kufika," alisema Ruhuza na kuongeza:   “Mkutano utafanyika keshokutwa (Jumamosi) lakini  bado hatujapanga eneo tutakapofanyia. Tukipanga tutawajulisha waandishi wa habari,” alisema Ruhuza. 

Alipoulizwa iwapo moja ya ajenda za mkutano huo ni kumjadili Kafulila, katibu mkuu huyo alisema kwamba hawezi kulizungumzia suala hilo sasa hadi muda mwafaka utakapowadia.  Chanzo cha habari ndani ya chama hicho kimeeleza kuwa kanuni za nidhamu na usuluhishi za NCCR  ukurasa wa 49, jedwali la saba kipengele cha kwanza na cha pili, zinaonyesha kuwa Kafulila anaweza kutimuliwa uanachama na huo baada ya kuondolewa uongozi.

Kwa mujibu wa chanzo hicho "Mtu yoyote anayetoa siri za chama nje ya vikao kama ni mara ya kwanza atapewa karipio kali au kuvuliwa uongozi na endapo akirudia mara ya pili, anavuliwa uanachama."  Vyanzo zaidi vilidokeza kwamba ni kosa kwa mwanachama kumtuhumu kiongozi au mwanachama mwenzake kupitia vyombo vya habari (nje ya vikao vya chama) na kwamba, kufanya hivyo ni sawa na kukihujumu chama. 

“Kafulila alitakiwa kupingana na Mbatia (Mwenyekiti) ndani ya vikao vya chama na siyo katika vyombo vya habari na sio yeye tu, wale wote waliohusika kufanya jambo hilo nao watahusishwa”, kilisema chanzo hicho na kuongeza:   “Suala hili karibu litafikia tamati na kumaliza mvutano ndani ya chama; Kafulila kavunja kanuni nyingi za chama sijui itakuwaje ngoja tusubiri uamuzi.”

Kauli ya Ruhuza  Awali, akizungumza na gazeti hili Ruhuza alisema hawezi kuzungumza mambo ya ndani ya chama kwa kuwa kwa kufanya hivyo naye atakuwa amevunja kanuni na taratibu za chama.  “Ninachoweza kuhoji ni kitendo cha Kafulila kuzungumza na vyombo vya habari juu ya barua niliyompa, kulikuwa na ulazima gani wa kuzungumza habari hizo?,” alihoji Ruhuza.

Alisema barua hiyo alimuandikia tangu Desemba 8 mwaka huu,  lakini iweje taarifa za yeye (Kafulila) kuvuliwa uongozi zianze kuibuka baada ya kukabidhiwa barua hiyo.  “Nashindwa kuelewa amezipeleka katika vyombo vya habari kwa mtizamo gani, mimi ningeweza kuwaita waandishi na kuwaeleza suala hilo lakini niliona halina maana yoyote,” alisema Ruhuza.  Ruhuza alisema kutokana na madaraka aliyopewa kikatiba, anaweza kuteua wajumbe wa Sekretarieti au kuwaengua bila kushauriana na mtu yoyote.

  “Nina mpango wa kuiboresha hii idara (Uenezi) ili kuipa makali, atakapoteuliwa mtu mwingine wa kuziba nafasi hiyo vyombo vya habari vitaelezwa,” alisema Ruhuza  Alipoulizwa kuhusu hatma ya Kafulila, alisema suala hilo hawezi kulizungumza bali linaweza kujadiliwa katika vikao vya ndani vya chama.  Mbatia  Akizungumza na Mwananchi Mbatia alisema  hawezi kuzungumza masuala ya utendaji wa chama katika vyombo vya habari na kutaka atafutwe Katibu Mkuu,  ili alizungumzie suala hilo.

“Mambo ya chama siyazungumzi katika vyombo vya habari nayazungumza katika vikao vya chama na nikifanya hivyo, nitakuwa nimekwenda nje ya kanuni na taratibu za chama,” alisisitiza Mbatia.   Kauli ya Kafulila  Kwa upande wake Kafulila alisema anachofahamu ni kwamba, mkutano wa Nec utakutana Februari 3, mwaka 2012 na katika mkutano huo, Mbatia ndiye atatakiwa kutoa maelezo ya ajenda iliyoibuliwa katika mkutano wa Nec  uliofanyika Novemba 5 mwaka huu kama ni mpinzani ama kibaraka wa CCM.

“Wajumbe wa Nec walionyesha kutokuwa na imani na Mbatia tangu mkutano wa Nec wa mwezi uliopita, na walimtaka awasilishe utetezi wake kwa Katibu Mkuu , utetezi ambao utajadiliwa katika kikao cha mwakani,” alisema Kafulila.  Alipoulizwa kuhusu kuzungumza mambo ya ndani ya chama katika vyombo vya habari Kafulila alihoji, “Mambo gani hayo ninayozungumza na vyombo vya habari? Chama ni vikao kaka, wewe muulize Ruhuza kama Mbatia ameshawasilisha utetezi wake”.

Kutokana na hali hiyo huenda mkutano huo ukaibua sura mpya ndani ya chama hicho kutokana na kwamba kuna baadhi ya wajumbe walionyesha kutokuwa na imani na Mbatia tangu katika mkutano wa NEC ulimalizika hivi karibuni.  

Katika hatua nyingine Ruhuza amesema hali ya siasa ndani ya chama hicho sasa ni shwari na kwamba kitaendelea kuwashughulikia wanachama wake wanaoonekana kuwa ni kikwazo kwa kutengeneza makundi yenye lengo la kukibomoa.  Alisema kuenguliwa kwa Mbunge huyo ni adhabu tosha na kwamba  chama hicho kitaendelea kufanya mabadiliko makubwa ya uongozi.

Alisema chama cha NCCR ni chama kikongwe hapa nchini na kwamba wanataka kukijenga ili kiwe imara ndio mana wameamua kufanya  mabadiliko ya uongozi ndani ya chama na kwamba kwa kuanzia wameanza katika nafasi ya Katibu Uwenezi kwa kumuondoa katika nafasi hiyo.  “Chama chetu hakiwezi kuyumbishwa na watu wachache na kwamba tumeamua kufanya mabadiliko ambayo sasa tunatengua baadhi ya vitengo ndani ya chama na kuweka uongozi mpya ambao utawezesha kuinua chama,” alisema Ruhuza. 

Aidha Ruhuza alifafanua kwamba kutokana na kazi ya ukatibu Uwenezi ndani ya chama kuhitaji muda mwingi kutekeleza majukumu yake ya kazi wameamua kumuondoa Mbunge huyo katika  nafasi yake iliaweze kupewa mtu ambae atafanya kazi hiyo kwa muda wote wa kazi. 

“Kama unavyo fahamu Kafulila ni Mbunge na anamajukumu mengi katika jimbo lake sasa hatuwezi kuendelea na nafasi hiyo ambayo inahitaji mtu wa kufanya katika muda wote wakazi ndio mana tumeamua kumpumzisha,” alisema  Hata hivyo Katibu Mkuu huyo alisema  suala la Kafulila sasa limekwisha na haipaswi tena kulizungumzia kwa sababu tayari chama kimeshatekeleza majukumu yake kwa kufuata Katiba ya chama hicho.