Usimamizi mbovu waathiri bonde Ziwa Tanganyika

USIMAMIZI dhaifu wa sheria za utunzaji na uhifadhi wa mazingira, umetajwa kuwa kikwazo katika mradi wa maendeleo ya Bonde la Ziwa Tanganyika na kusababisha kushindwa kuchukua hatua dhidi ya wanaoharibu mazingira.

Meneja wa Mradi huo, Hawa Mshamu alisema hayo jana katika ziara ya kutembelea baadhi ya maeneo ya mradi baada ya mkutano wa siku moja wa wadau kupeana taarifa ya hali ya maendeleo ya mradi huo.

Alikuwa akijibu baadhi ya maswali ya wajumbe wa ziara hiyo waliotaka kujua uongozi wa mradi unachukua hatua gani kwa watu wanaokaidi kutekeleza mradi au wanaoharibu mazingira.

Alisema kazi kubwa ya mradi ni kutoa elimu kwa jamii ya nini kifanyike kwa manufaa ya siku za baadaye pamoja na kusimamia miradi mbalimbali ya utunzaji na uhifadhi mazingira, ikiwemo upandaji miti na miradi ya kujiingizia kipato kwa jamii katika baadhi ya vijiji.

Akizungumza katika mkutano huo wa siku moja, Mkurugenzi wa Mazingira wa Mamlaka ya Bonde la Ziwa Tanganyika (LTA), Gabriel Hakizimana alisema kuwa yapo mafanikio yaliyopatikana tangu kuanza kwa mradi ingawa zipo changamoto ambazo bado zinatakiwa kufanyiwa kazi zaidi.

Hakizimana alisema kikubwa zaidi elimu na uhamasishaji jamii unatakiwa kufanywa kwa nguvu kubwa ili kuifanya jamii itambue umuhimu wa utunzaji na uhifadhi wa bonde hilo kwa kipindi kirefu kijacho na kuvitaka vyombo vya habari kushiriki katika mkakati huo.

Alisema Ziwa Tanganyika ni urithi wa dunia likiwa na zaidi ya aina 600 za viumbe ambapo kati yake, 200 havipatikani mahali popote zaidi ya ndani ya ziwa hilo.

Kutokana na umuhimu huo, aliitaka nchi na jamii inayozunguka ziwa hilo, kulitunza kwa hali na mali. Akifungua mkutano huo Mkuu Wilaya Kigoma, Ramadhani Maneno alisema wananchi wanapaswa kulifanya suala la uhifadhi na utunzaji mazingira ya Bonde la Ziwa Tanganyika kuwa sehemu ya maisha yao kutokana na umuhimu wa ziwa hilo.